Is-Servizz Pubbliku fil-Freshers’ Week 2025: Appoġġ lill-Istudenti fl-UM u l-MCAST

Is-Servizz Pubbliku kburi li qed jieħu sehem fil-Freshers’ Week 2025, fejn se jilqa’ lill-istudenti kemm fl-Università ta’ Malta kif ukoll fl-MCAST. Din l-inizjattiva annwali tirrifletti l-impenn kontinwu tas-Servizz Pubbliku li jkun preżenti, aċċessibbli, u ta’ appoġġ għaż-żgħażagħ hekk kif jibdew il-vjaġġ akkademiku tagħhom.

Mid-29 ta’ Settembru sat-3 ta’ Ottubru, is-Servizz Pubbliku se jkun preżenti fl-Università ta’ Malta, imbagħad mis-6 sat-8 ta’ Ottubru fl-MCAST, Raħal Ġdid. Din is-sena l-parteċipazzjoni tirrifletti espansjoni sinifikanti kemm fil-preżenza kif ukoll fis-servizzi offruti, b’enfasi fuq li l-appoġġ essenzjali jsir aktar aċċessibbli għall-istudenti.

Bħal fis-snin ta’ qabel, l-Istitut għas-Servizzi Pubbliċi (IPS) kellu rwol ewlieni fl-appoġġ għal din l-inizjattiva u għal darb’oħra se jkun preżenti fl-istend, fejn se joffri lill-istudenti aċċess dirett għal informazzjoni dwar l-iskemi tal-IPS u l-firxa wiesgħa ta’ opportunitajiet disponibbli għalihom.

Fl-istend tas-Servizz Pubbliku, l-istudenti jistgħu jibbenefikaw minn varjetà ta’ servizzi u attivitajiet, fosthom:

• Tallinja Card b’xejn
• Ċertifikati tal-Kondotta tal-Pulizija
• Inizjattivi ta’ Promozzjoni tas-Saħħa
• Applikazzjonijiet għall-Għotjiet ta’ Manteniment
• Sfidi interattivi dwar l-ikel u attivitajiet għall-benesseri
• Informazzjoni dwar l-iskemi tal-IPS u l-opportunitajiet għall-istudenti

L-istudenti huma mħeġġa jżuru l-istand biex jaċċessaw is-servizzi direttament, jistaqsu mistoqsijiet, u jieħdu sehem f’attivitajiet divertenti u informattivi li jippromwovu l-benesseri u l-ħajja tal-istudenti.

Il-Freshers’ Week tipprovdi opportunità unika għas-Servizz Pubbliku biex jiltaqa’ mal-istudenti wiċċ imb wiċċ, u joffri appoġġ prattiku u gwida f’ambjent amikevoli u aċċessibbli.

Ejjew iltaqgħu magħna — aħna hawn għalikom!