Il-Karriera Tiegħek Tibda Hawnhekk: Esplora Opportunitajiet fis-Servizz Pubbliku fil-UoM Careers Expo

Is-Servizz Pubbliku se jkun qed jipparteċipa b’mod attiv fil-Careers Expo fl-Università ta’ Malta fid-9, l-10 u l-11 ta’ Marzu 2026. Dan l-avveniment annwali jipprovdi pjattaforma importanti għal interazzjoni ma’ studenti u gradwati li qed jesploraw il-mogħdijiet tal-karriera futura tagħhom.

Matul l-Expo, is-Servizz Pubbliku jikkompeti ma’ impjegaturi ewlenin fl-attrazzjoni ta’ talent ġdid, filwaqt li jesibixxi l-opportunitajiet ta’ karriera diversi u sodisfaċenti disponibbli fi ħdan is-Servizz Pubbliku. L-Istitut għas-Servizzi Pubbliċi (IPS) se jkun qed jiltaqa’ wkoll mal-istudenti permezz ta’ sessjonijiet wiċċ imb’ wiċċ, u joffri għarfien siewi dwar l-iżvilupp tal-karriera, it-tkabbir professjonali, u l-benefiċċji tax-xogħol fi ħdan is-Servizz Pubbliku. Dawn l-interazzjonijiet diretti jservu bħala opportunità biex jiġu enfasizzati aspetti ewlenin relatati mal-attrazzjoni u ż-żamma fit-tul.

L-IPS se jkun qed jippromwovi l-IPS Student Scheme (ICT), kif ukoll l-IPS Student Scheme (Under/Post-Graduate, u b’hekk jipprovdi għall-istudenti mogħdijiet strutturati biex jibdew u javvanzaw fil-karriera tagħhom. Permezz ta’ dawn l-inizjattivi, l-istudenti jistgħu jirrikonoxxu lis-Servizz Pubbliku bħala impjegatur b’saħħtu u vijabbli li jipprovdi mogħdija ta’ karriera tul il-ħajja professjonali kollha tagħhom.

Avvenimenti bħall-UOM Careers Expo iservu bħala għodda effettiva ta’ marketing biex jintlaħqu studenti prospettivi, filwaqt li joffrulhom ukoll l-opportunità li jifhmu aħjar x’inhu s-Servizz Pubbliku u x’għandu x’joffri bħala impjegatur modern, kompetittiv u b’ħarstu lejn il-futur.