Dan il-proġett huwa maħsub biex joffri taħriġ – kemm Malta kif ukoll barra - f’oqsma differenti lil uffiċjali pubbliċi. Dawn se jkollhom l-opportunità li jitħarrġu permezz ta’ boroż ta’ studju għal korsijiet akkademiċi, seminars, konferenzi, taħriġ vertikali u placements, u li jpoġġu fil-prattika dak li jkunu tgħallmu fuq il-post tax-xogħol. Din hija t-triq li l-Amministrazzjoni Pubblika trid timxi fuqha biex l-impjegati tagħha jkollhom dejjem aktar ħiliet aħjar. 

Huwa maħsub li dan il-proġett jinvesti fit-taħriġ, tagħlim u żvilupp fuq l-istess direzzjoni kemm tal-missjoni tal-Istitut għas-Servizzi Pubbliċi kif ukoll tal-Operational Programme, u speċifikament tas-sejħa li taħtha jaqa’ l-għan tat-tagħlim tul il-ħajja u t-transizzjonijiet tal-karriera. 

L-investiment se jkun immirat lejn dawn l-oqsma:

1. Taħriġ Akkademiku
2. Titjib ta’ ħiliet u akkwist ta’ ħiliet ġodda (upskilling u reskilling) kemm tal-impjegati tekniċi kif ukoll ta’ dawk li għandhom għarfien tekniku jew li huma esperti fil-qasam tagħhom u li jixtiequ jimxu lejn pożizzjonijiet ta’ tmexxija jew li jeħtiġilhom iwettqu dmirijiet ġodda skont l-eżiġenzi tas-Servizz. 
3. Il-perspettiva internazzjonali: attivitajiet f’Malta mmexxija minn esperti barranin, attivitajiet barra minn Malta, opportunitajiet ta’ job shadowing,  inkluż internships u placements.
4. Taħriġ vertikali: dan se jgħin lil dawk il-ministeri li għandhom proġetti speċifiċi ta’ taħriġ li hu meħtieġ fil-qasam partikolari tagħhom. Dawn l-oqsma jistgħu ma jkunux neċessarjament dawk li fuqhom qiegħed jiffoka dan il-proġett iżda li madankollu xorta waħda jaqgħu taħt il-kappa ta’ tagħlim tul il-ħajja u tranżazzjonijiet tal-karriera.